O PSALMO 49.
Karing o maibaro le dilabaitorengo. Khă psalmo le šeavendi le Korehkă.
1 Ašunen e buti kadea, sa le popoare,
len godi, sal manuši la lumekă:
2 çînoră thai bară,
bravale thai čioŕă!
3 Muŕo mui dela duma divanuri godeaver,
thai o illo muŕo sî les gîndurea pherde krisakă.
4 Me bandearau muŕo kan kal sîkaimata kai sî mangă phurdine,
pîtrau mîŕî dili ando bašimos la xarpako.
5 Anda soste te darau andel des le bibaxtalimahkă,
kana denmaroata e bikris mîŕă dušmaiendi?
6 On patean pe ande pehkă bravalimata,
thai den pe bară ande pehko bravalimos.
7 Ta našti te potinen pe iekh pe aver,
čina te del le Devllehkă o lov le potindimahko.
8 O potindindimos lengo duxohko sî kaditi dă kuči,
kă či kărdeola pe čiăkhdata.
9 Či traina ando veako,
naštin te na dikhăn o mormînto.
10 E, dikhăna les: kă le xarane merăn,
o dilo thai o čealado lidui merăn,
thai mekăn avrăngă pehkă mandimata.
11 On den pe godi kă vešniko avena lengă khăra,
kă lengă thana ašena ando veako le veakohko,
on, kai den o anau lengo kal čema bară.
12 Ta o manuši thodino ande pativ či ašel,
ta sî sar le jivine kai šindeon pe.
13 Dikta so bax sîle len, kodala pherde dă kaditi pateamos,
sar i kola kai phirăn pala lende, savengă čeaileon lengă divanuri. (Atărdimos).
14 Sî nigărde sar khă kîrdo ando than kai sî le mulle,
xale o mullimos, thai iekhatar le manuši bibezexale ušteaven le andel pînŕă:
jealtar lengo mîndrimos, thai o than le mullengo sî lengo bešlimos.
15 Ta mangă o Dell skăpila muŕo duxo anda o than le mullengo,
kă lela ma tala Pehko arakhaimos. (Atărdimos).
16 Na dara kana bravaol varekon,
thai kana buteon le bravalimata lehkă khărăhkă;
17 kă či lel khanči pesa kana merăll:
Le bravalimata lehkă či ulen pala leste.
18 Sa te pateal pe o manuši baxtalo ande čivava,
sa telăudil pe le bukurimatănça kai kărăl pehkă le,
19 kă sa ando than pehkă daddengo jeala,
thai či mai dikhăla e lumina čiăkhdata.
20 O manuši thodino ande pativ, thai bi prinjeandimahko,
sî sar le jivine kai šines le.