O PSALMO 52.
Karing o mai baro le dilabaitorengo.Khă dilabaimos le Davidohko. Kărdo kolengă phendine le Doegostar, o Edomito, le Saulohkă, kana phenelas: „O Davido gălo ando khăr le Aximelohko.”
1 Anda soste des tu baro te nasulimasa, manuši nasulimahkona?
O lašimos le Devllehko nikrăl andel veakurea.
2 E šib tiri ankalavel dăsar nasulimata,
sar khă bričio skuçome, čiorimahko so san!
3 Tu kames mai iekhatar o nasul dă sar o mištimos,
mai iekhatar o xoxaimos dă sar o čeačimos. (Atărdimos) .
4 Tu kames dăsar divanuri xasardimahkă, šib athaimasti!
5 Anda kodea i o Dell peravela tu ando veako,
astarăla tu thai vazdela tu andai çăra Ttri,
anglunila tu anda e phuw le juvindendi. (Atărdimos) .
6 Kola bi bezexako dikhăna e buti kadea, darana,
thai asana lestar, phendindoi:
7 „Dikta o manuši, kai či lelas arakhaitorii le Devlles,
ta patealas pe andel bravalimata lehkă kola le bară,
thai nikrălas pe ando nasulimos lehko.”
8 Ta me sîm ando Khăr le Devllehko sar khă zetino zăleno,
pateau ma ando lašimos le Devllehko, ando veako le veakurengo.
9 Lăudiua Tu orkana, anda kă kărdean buti,
thai, anglal šaoŕă Tiră, ajukraua ando Anau Tiro, kă san lašimahko.