O PSALMO 57.
Karing o mai baro le dilabaitorengo. „Na xasar le.” Khă dilabaimos lăudimahko le Davidohko. Kărdi kana Našlo ando thanšudro, kana phirălas o Saulo pala leste.
1 Avel Tu mila mandar, Devlla, avel Tu mila mandar!
Kă ande Tute pateal pe muŕo duxo;
Kai ušal te phakăndi rodau mangă than skăpimahko,
ji kana nakhăna sal bibaxtalimata.
2 Me çîpi karing o Dell, karing Kukoa o But Baro,
karing o Dell, kai kărăl buti anda mande.
3 O tradela mangă skăpimos andoa čerii,
ando čiro so o dušmano muŕo šudel mangă prasaimata.
E, o Dell tradela o lašimos thai o pateaimos.
4 O duxo muŕo sî varesar maškar leia:
bešeau suto maškar iekhă manušengă kai šorăn iaga,
ando maškar une manušengă savengă dandd sî suliçî thai săjeçî,
thai savendi šib sî khă sabia skuçome.
5 Vazde Tu pal čerurii, Devlla,
pa sai phuw te tinzol pe Ti slava!
6 O tinzosardesas khă phal tala le pînŕă mîŕă;
o duxo muŕo bandeolas,
thai xunadesas mangă khă groapa angle:
ta peline on ande late. (Atărdimos)
7 Muŕo illo sî zuralo, Devlla, Muŕo illo sî zuralo;
Dilabaua, e, thai bašavaua andal instrumente mîŕă.
8 Ušti ta, duxona! Ušten ta, lăută thai xarfă!
Ušteaua kana phaŕadeola o des.
9 Laudiua Tu maškar le popoare, Raia!
Dilabaua Tu maškar le neamurea.
10 Ko lašimos Tiro arăsăl ji kal čerururea,
thai o pateaimos Tiro ji kal norea.
11 Vazde Tu pal čerurii, Devlla,
pa sai phuw te tinzol pe Ti slava!