O PSALMO 6.
Karing o mai baro le dilabaitorengo.Dă dilabaimos pe le instrumente koardença.Pe xarfa oxto koardença. Khă psalmo le Davidohko.
1 Raia, na došar ma ande Tiri xoli,
thai na xatu mança ande Tiro xolearimos.
2 Avel tu milla mandar, Raia, kă šutiuau!
Sastear ma, Raia, isdran mîŕă kokala.
3 Muŕo duxo sî darardino dă sa;
thai Tu, Raia, ji kana bešesa te avel Tukă milla mandar?
4 Ambolde Tu, Raia, skăpisar muŕo duxo!
Skăpisar ma, anda Tiri milla!
5 Kă kukoa kai merăll či mai anel pehkă godi Tutar;
thai kon mai lăudila Tu ando khăr le mullengo?
6 Našti mai vatindoi ma!
Ande sako reat pitearau muŕo than,
thai nairau o than andel iasfa.
7 Šuti'lo muŕo mui tristomahko,
thai phurilo andai zan kolengo kai našaven ma.
8 Dureon mandar, sa kola kai kărăn nasul!
Kă o Rai ašundea o mui mîŕă roimatăngo!
9 O Rai ašunel mîŕă manglimata,
Thai o Rai lel muŕo rudimos!
10 Sea mîŕă dušmaia avena garade lajavestar, thai astarde daratar;
andakhdata dena parpale, garade lajavestar.