O PSALMO 20.
Karing o mai baro le dilabaitorengo. Khă psalmo le Davidohko.
1 Te ašunel tu o Rai ando des le năkazohko,
te avel paša tu o Anau le Devllehko le Iakovohko,
2 te tradel tukă kandimos andoa than Lehko kukoa o Sfînto,
thai te nikărăl tu andoa Siono!
3 Te anel Pehkă godi anda sal pativa tiră le xabenehkă,
thai te lel te phabarimata tiră dă sa! (Atardimos)
4 Te del tu sa so kamel teo illo,
thai te pherăl sa le planurea tiră!
5 Atunčeara ame bukurisauasa anda tiro izbîndimos,
thai činosarasa o flako ando Anau amară Devllehko.
O Rai te ašunel sa le kamimata tiră!
6 Jeanau dă akanara kă o Rai skăpil Pehkă makhles,
thai dela les anglal andal čerurii, andoa than Lehko kukoa o Sfînto,
ando kandimos aseazuralo la čeačeako Lesti.
7 Unii patean pe pehkă urdona, aver pel grast lengă;
ta ame pateas ame po Anau le Raiehko, amară Devllehko.
8 On bandeon thai perăn;
ta ame vazdas ame thai ašeas ande pînŕănde.
9 Skăpisar Raia, le thagares,
thai ašuna ame kana akharas Tu!