O PSALMUL 76.
Karing o maibaro le dilabaitorengo.Dilabaimahko le instrumentença le koardença. Khă psalmo le Asafohko.Khă dilabaimos.
1 O Dell sî prinjeando ando Iuda,
baro sî Lehko Anau ando Israelo.
2 E çăra Lesti sî ando Salemo,
thai o than Lehko ando Siono;
3 oče linčeardea O le săjeçi,
o skhuto, e sabia, thai le arme le mardimahkă. (Atărdimos)
4 Tu san barimahko, mai zuralo sar le baŕlebară le čiorditorengă.
5 Nandearde sas le zurale kodola pherde illehko, sutine e lindri le merimasti;
Naštisarde te arakhăn pe, sa kodola manuši le zurale.
6 Kai xolli Tiri, Devlla le Iakovohko,
sutine i le grastarea thai i le grast.
7 Sode dă daraimahko san Tu!
Kon dašti te ašel angla Tute, kana astardeol Ti xolli?
8 Phendean o mothodimos dă opral andal čerurii;
e phuw izdraia thai ašili muto,
9 kana vazdinisai'lo o Dell te kărăl čeačimos,
thai te skăpil sa le bibaxtalen pai phuw. (Atărdimos)
10 O manuši lăudil Tu orta i ande xolli lesti,
kana xureaves Tu sa Te xollearimasa.
11 Kărăn solaxaimata le Devllehkă, tumară Devllehkă, thai pherăn le!
Sa kola kai den Les roata, te anen pativa le Devllehkă kolehkă le daraimahko.
12 O phagăl o barimos le raimatango,
O sî daraimahko anda le thagar la phuweakă.